Хархорин сумын Ерөнхий боловсролын 2 дугаар сургуулийн 2024 оны санхүүгийн үйл ажиллагаанд хяналт шалгалт хийсэн тухай

Аймгийн Засаг даргаар батлуулсан 2025 оны гүйцэтгэлийн төлөвлөгөө, Санхүүгийн хяналт, дотоод аудитын газрын даргын 2025 оны 06 дугаар сарын 30-ны өдөр баталсан 29/19 дүгээр удирдамжийн дагуу Хархорин сумын Ерөнхий боловсролын 2 дугаар сургуулийн 2024 оны санхүүгийн үйл ажиллагаанд хяналт шалгалт хийхэд тухайн байгууллагын санхүү, нягтлан бодох бүртгэлийн үйл ажиллагаа тасралтгүй явагдаж, санхүүгийн тайлан баланс, ажил гүйлгээний мэдээ тайланг хуулийн хугацаанд гаргаж, төсөв хөрөнгийг зарцуулахдаа холбогдох нотлох анхан шатны баримтуудыг бүрэн бүрдүүлсэн байгаа боловч ажлаас чөлөөлөгдсөн албан хаагчидтай ээлжийн амралтын эцсийн тооцоо хийдэггүй, ээлжийн амралтын мэдэгдэл бичдэггүй, тооллогын комиссын бүрэлдэхүүнд нярав нягтлан орж тооллого хийсэн, албан хаагчид томилолтоор ажилласан ажлын гүйцэтгэлийн тайлан бичдэггүй, томилолтын ирсэн буцсан тэмдэглэгээ байхгүй байхад томилолт олгосон, дотоод хяналтын ажлыг хийж хэрэгжүүлэхдээ удирдамж гарган хийдэггүй, шилэн дансанд мэдээллийг дутуу байршуулдаг, төрийн алба хаасан хугацааг хүний нөөцийн системд буруу оруулснаас албан хаагчдын цалинг илүү дутуу тооцон олгосон, анги даасны нэмэгдэл, ур чадварын нэмэгдэлийг тушаал шийдвэргүйгээр олгосон зэрэг зөрчлүүд нь төсвийн захирагчийн болон санхүүгийн ажилтны ажилдаа хайнга хандсан, санхүүгийн үйл ажиллагаанд тавих шат дараалсан хяналт дутмаг байгаатай холбоотой гэж дүгнэлээ.

Энэ удаагийн шалгалтаар цалин хөлс, нэмэгдэлтэй холбоотой 4,254,962 (дөрвөн сая хоёр зуун тавин дөрвөн  мянга есөн зуун жаран хоёр) төгрөгийн зөрчил илэрч, илүү олгосон цалин 3,637,898 (гурван сая зургаан зуун гучин долоон мянга найман зуун ерэн найм) төгрөгийг буцаан төлүүлэхээр, дутуу олгосон цалин 617,064 (зургаан зуун арван долоо мянга жаран дөрөв) төгрөгийг буцаан олгохоор улсын ахлах байцаагчийн акт тогтоолоо.