Аймгийн төсвийн ерөнхийлөн захирагчийн дэргэдэх
дотоод аудитын хороогоор батлуулсан 2026 оны төлөвлөгөө,
Санхүүгийн хяналт, дотоод аудитын газрын даргын 2026 оны 06 дугаар сарын 11-ний
өдөр баталсан 29/11 дүгээр удирдамжийн
дагуу Есөнзүйл сумын Эрүүл мэндийн төвийн 2025 оны санхүүгийн үйл ажиллагаанд хяналт
шалгалт хийхэд байгууллагын санхүү, нягтлан бодох бүртгэлийн үйл ажиллагаа тасралтгүй
явагдаж, санхүүгийн тайлан баланс, ажил гүйлгээний мэдээ тайланг гаргаж хэвшсэн боловч төсөв хооронд
зохицуулалт хийлгүйгээр зориулалт бусаар зарцуулдаг, эд хөрөнгийн тооллогын
ажлын хэсэгт нягтлан бодогч, няравыг оруулан томилодог, цахим нэхэмжлэх болон и
баримтгүй гүйлгээ хийдэг, томилолтыг хэд хоногоор олгохыг зөвшөөрсөн даргын
гарын үсэггүй олгодог, томилолтын ирсэн буцсан тамга дутуу, ирсэн буцсан он сар
өдөр буруу бөглөгдсөнөөр олгодог, ээлжийн амралтын хуваарь баталсан тушаал
гаргадаггүй, амралтын мэдэгдлийг буруу бичдэг, ажлаас
чөлөөлөгдсөн албан хаагчидтай эцсийн тооцоо хийдэггүй, төрийн алба хаасан
хугацааны нэмэгдлийг дутуу олгодог, тушаал шийдвэргүйгээр гүйцэтгэлийн
урамшуулал олгодог, улирлын мэдээг хугацаа хоцроож илгээдэг, байгууллагын батлагдсан төсөв, гүйцэтгэл, хэтрэлт
хэмнэлтийн шалтгаан тайлбар оруулдаггүй, харилцагч
байгууллагуудын өглөг, авлагын тооцоо
нийлсэн актыг байршуулдаггүй зэрэг зөрчлүүд нь ажил хариуцсан албан хаагчид ажилдаа хайнга
хандсан, санхүүгийн
холбогдолтой хууль эрх зүйн мэдлэг дутмаг, санхүүгийн үйл
ажиллагаанд тавих шат дараалсан болон дотоод хяналт сул, санхүүгийн сахилга бат алдагдах эрсдэлтэй
байна. Ийм төсвийн захирагч болон санхүүгийн ажилтнууд төсөв санхүүгийн үйл
ажиллагааны талаарх мэдлэг мэдээллээ сайжруулах, холбогдох хууль, дүрэм журмыг
судлаж мэдэх, зөв хэрэглэх, түүнд тогтмол хяналт тавих, дотоод хяналтын нэгжийн
санхүүгийн үйл ажиллагаанд хяналт хийх, санхүүгийн ажилтнууд төсвийн шууд
захирагчийг мэргэжил арга зүй, мэдээллээр сайн хангаж ажиллахад анхаарах
шаардлагатай байна.
Энэ
удаагийн шалгалтаар анхан шатны баримттай холбоотой 5,515,000 (таван сая таван
зуун арван таван мянга) төгрөгийн, зориулалт бусаар зарцуулсан 9,314,200 (есөн
сая гурван зуун арван дөрвөн мянга хоёр зуу) төгрөгийн, цалин хөлстэй холбоотой
16,242,949 (арван зургаан сая хоёр
зуун дөчин хоёр мянга есөн зуун дөчин ес) төгрөгийн
нийт 31,072,149 (гучин нэгэн сая далан хоёр мянга нэг зуун дөчин ес) төгрөгийн зөрчлийг
илрүүлж, дутуу олгосон цалин 303,769 (гурван зуун гурван
мянга долоон зуун жаран ес)
төгрөгийг нөхөн олгуулахаар улсын ахлах байцаагчийн акт тогтоож, зориулалт
бусаар зарцуулсан 9,314,200 (есөн сая гурван зуун арван дөрвөн мянга хоёр зуу)
төгрөгийн зөрчлийг таслан зогсоох, цаашид давтан гаргахгүй байх талаар улсын
байцаагчийн 2 заалт бүхий албан шаардлага, илэрсэн зөрчлийг цаашид анхаарах давтан
гаргахгүй байхаар 7 заалт бүхий зөвлөмжийг өгч ажиллалаа.
