Богд сумын Ерөнхий боловсролын нэгдүгээр сургуулийн 2024 оны санхүүгийн үйл ажиллагаанд хяналт шалгалт хийсэн тухай

         Аймгийн Засаг даргаар батлуулсан 2025 оны гүйцэтгэлийн төлөвлөгөө, Санхүүгийн хяналт, дотоод аудитын газрын даргын 2025 оны 10 дугаар сарын 23-ны өдөр баталсан 29/25 дугаар удирдамжийн дагуу Богд сумын Ерөнхий боловсролын нэгдүгээр сургуулийн  2024 оны санхүүгийн үйл ажиллагаанд хяналт шалгалт хийж гүйцэтгэлээ.

Хүний нөөцийн системд албан хаагчдын мэдээллийг хянаагүйгээс албан хаагчдад төрийн алба хаасан хугацааны нэмэгдлийг илүү дутуу олгосон, ажлаас гарч байгаа хүнтэй ээлжийн амралтын эцсийн тооцоо хийдэггүй, ажилчидад ур чадвар, зэрэг дэв, орон нутгийн нэмэгдлийг олголгүй орхигдуулсан, үдийн цай хөтөлбөрийн зардлыг нормативт зардлаас дутуу зарцуулсан, дотуур байрны хүүхдийн хоолны зардлыг нормативт хэмжээнд зарцуулж байгаа эсэхэд хяналт тавьдаггүй, шилэн дансанд мэдээллийг буруу дутуу байршуулдаг, шатахууны зарцуулалтад жолоочийн тооцооны хуудас бичээгүй, аж ахуйн материалыг шаардах хуудсаар шууд зарлагадсан зэрэг нь төсвийн захирагчийн болон санхүүгийн ажилтны хууль эрх зүйн мэдлэг мэдээлэл дутмаг, санхүүгийн үйл ажиллагаанд тавих шат дараалсан болон дотоод хяналтыг хийж хэрэгжүүлэхгүй байгаатай холбоотой гэж дүгнэлээ.

Иймд цаашид төсвийн захирагч болон санхүүгийн ажилтнууд төсөв санхүүгийн үйл ажиллагаатай холбоотой мэдлэг мэдээллээ дээшлүүлэх, мэргэжлийн байгууллагуудаас зөвлөгөө авах, санхүүгийн үйл ажиллагаанд тавих дотоод хяналтыг сайжруулах шаардлагатай.

Энэ удаагийн шалгалтаар цалин хөлс, нэмэгдэлтэй холбоотой 3,294,651 (гурван сая хоё зуун ерэн дөрвөн мянга зургаан зуун тавин нэг) төгрөг, анхан шатны баримттай холбоотой 31,290,656 (гучин нэгэн сая хоёр зуун ерэн мянга зургаан зуун тавин зургаа) төгрөг, үдийн цай хөтөлбөрийн зардлыг нормативт зардлаас дутуу зарцуулсан 1,461,350 (нэг сая дөрвөн зуун жаран нэгэн мянга гурван зуун тавь) төгрөг нийт 36,046,657 (гучин зургаан сая дөчин зургаан мянга зургаан зуун тавин долоо) төгрөгийн зөрчил илрүүлж, илүү олгосон цалин 2,169,740 (хоёр сая нэг зуун жаран есөн мянга долоон зуун дөч) төгрөгийг суутган тооцох, дутуу олгосон цалин  1,124,911 (нэг сая нэг зуун хорин дөрвөн мянга есөн зуун арван нэг) төгрөгийг нөхөн олгох улсын ахлах байцаагчийн акт тогтоож, цаашид анхаарах 10 заалт бүхий зөвлөмж өгч ажиллалаа.