Баян-Өндөр сумын Соёлын төвийн 2024 оны санхүүгийн үйл ажиллагаанд хяналт шалгалт хийсэн тухай

Аймгийн Засаг даргаар батлуулсан 2025 оны гүйцэтгэлийн төлөвлөгөө, Санхүүгийн хяналт, дотоод аудитын албаны даргын 2025 оны 05 дугаар сарын 15-ны өдөр баталсан 29/12 дугаар удирдамжийн дагуу Баян-Өндөр сумын Соёлын төвийн  2024 оны санхүүгийн үйл ажиллагаанд түрээсийн орлогыг төсвийн харилцах дансанд тушаахгүй, санхүүгийн тайланд тусгахгүйгээр төсвөөр гадуур зарцуулсан, хагас жилийн тооллого хийгээгүй, үндсэн хөрөнгийн үлдэгдэлд тооцоо бодсон актыг үйлдээгүй, эрхлэгчийн шийдвэрээр зарцуулсан баримтыг эх хувиар нь санхүүгийн баримтанд хавсаргаагүй, тушаал шийдвэрийн үндэслэл буруу бичсэн, архивийн баримтанд байхгүй, эрсдэлд суурилсан дотоод хяналтын төлөвлөгөө гаргаагүй, удирдамж боловсруулан гаргаж дотоод хяналтыг хийдэггүй, дотоод хяналтыг чанаргүй ор нэр төдий хийдэг зэрэг зөрчлүүд нь ажил хариуцсан албан хаагчид ажилдаа хайнга хандсан, санхүүгийн үйл ажиллагаанд дотоод хяналт тавьдаггүй зэргээс үүдэлтэй гэж дүгнэлээ. Ийм төсвийн захирагч болон санхүүгийн ажилтнууд төсөв санхүүгийн үйл ажиллагааны талаарх мэдлэг мэдээллээ сайжруулах, холбогдох хууль, дүрэм журмыг судлаж мэдэх, зөв хэрэглэх, дотоод хяналтын нэгжийн үйл ажиллагааг сайжруулах, санхүүгийн ажилтнууд төсвийн шууд захирагчийг мэргэжил арга зүй, мэдээллээр сайн хангаж ажиллахад анхаарах шаардлагатай байна.  

Энэ удаагийн шалгалтаар анхан шатны баримттай холбоотой 2,717,300 (хоёр сая долоон зуун арван долоон мянга гурван зуу) төгрөгийн, орлогыг төсвийн харилцах дансанд тушаахгүй, санхүүгийн тайланд тусгахгүйгээр төсвөөр гадуур зарцуулсан 290,000 (хоёр зуун ерэн мянга) төгрөг нийт 3,007,300 (гурван сая долоон мянга гурван зуу) төгрөгийн зөрчил илэрч зөрчлийг давтан гаргахгүй байх талаар 5 заалт бүхий зөвлөмж өглөө.