Сант сумын Ерөнхий боловсролын сургуулийн 2024 оны санхүүгийн үйл ажиллагаанд хяналт шалгалт хийсэн тухай

Аймгийн Засаг даргаар батлуулсан 2025 оны гүйцэтгэлийн төлөвлөгөө, Санхүүгийн хяналт, дотоод аудитын газрын даргын 2025 оны 04 дүгээр сарын 17-ны өдөр баталсан 29/08 дугаар удирдамжийн дагуу Сант сумын Ерөнхий боловсролын сургуулийн  2024 оны санхүүгийн үйл ажиллагаанд хяналт шалгалтыг хийхэд цалин, ээлжийн амралтын цалинг давхардуулан олгосон, ажлаас чөлөөлөгдсөн албан хаагчидтай ээлжийн амралтын эцсийн тооцоо хийдэггүй, тушаал шийдвэрийг давхардуулан гаргадаг, ур чадварын тушаалыг их хэмжээгээр гаргадаг, цаг бүртгэлийг буруу хөтлөн гаргадаг, төсвийн зардал хооронд зохицуулалт хийлгүйгээр зориулалт бусаар зарцуулсан, үдийн цай хөтөлбөрийн зардлыг нормативт зардлаас дутуу зарцуулсан, дотуур байрны хүүхдийн хоолны зардлыг нормативт хэмжээнд зарцуулж байгаа эсэхэд хяналт тавьдаггүй, шилэн дансанд мэдээллийг буруу дутуу байршуулдаг зэрэг нь төсвийн захирагчийн болон санхүүгийн ажилтны хууль эрх зүйн мэдлэг мэдээлэл, ур чадвар дутмаг, ажилдаа хайнга хандсан, санхүүгийн үйл ажиллагаанд тавих шат дараалсан болон дотоод хяналтыг хийж хэрэгжүүлэхгүй байгаатай холбоотой гэж дүгнэлээ.

Цаашид төсвийн захирагч болон санхүүгийн ажилтнууд төсөв санхүүгийн үйл ажиллагаатай холбоотой мэдлэг мэдээллээ дээшлүүлэх, мэргэжлийн байгууллагуудаас зөвлөгөө авах, санхүүгийн үйл ажиллагаанд тавих дотоод хяналтыг сайжруулах шаардлагатай.

Энэ удаагийн шалгалтаар цалин хөлс, нэмэгдэлтэй холбоотой 15,837,292 (арван таван сая найман зуун гучин долоон мянга хоёр зуун ерэн хоёр) төгрөг, анхан шатны баримттай холбоотой 2,047,700 (хоёр сая дөчин долоон мянга долоон зуу) төгрөг, зориулалт бусаар зарцуулсан 2,475,136 (хоёр сая дөрвөн зуун далан таван мянга нэг зуун гучин зургаа) төгрөг, үдийн цай хөтөлбөрийн зардлыг нормативт зардлаас дутуу зарцуулсан 598,050 (таван зуун ерэн найман мянга тавь) төгрөг, нийт 20,958,178 (хорин сая есөн зуун тавин найман мянга нэг зуун далан найм) төгрөгийн зөрчил илрүүлж, илүү олгосон цалин  15,837,292 (арван таван сая найман зуун гучин долоон мянга хоёр зуун ерэн хоёр) төгрөгийг буцаан төлүүлэхээр улсын ахлах байцаагчийн акт тогтоон, 11 заалт бүхий зөвлөмж өглөө.