СУМ ХӨГЖҮҮЛЭХ САНГИЙН ҮЙЛ АЖИЛЛАГААНД ХИЙГДСЭН ХЯНАЛТ ШАЛГАЛТЫН ҮР ДҮН

Өвөрхангай аймгийн Санхүүгийн хяналт, аудитын алба нь аймгийн Засаг даргын үйл ажиллагааны хөтөлбөрт тусгагдсаны дагуу 2019 оноос хойш аймгийн 19 сумын Сум хөгжүүлэх сангийн үйл ажиллагаанд тогтмол хяналт хийж, хугацаа хэтэрсэн зээлүүдийг буцаан төлүүлэх арга хэмжээг сумдын Засаг дарга, Прокурорын байгууллагуудтай хамтран зохион байгуулан ажиллалаа. Энэ ажлын хүрээнд 2018 оны жилийн эцсийн байдлаар нийт зээлийн 41% нь хугацаа хэтэрч байсан бол 2021 оны жилийн эцсийн байдлаар 25,5% болж буурсан сайн үр дүн гарч байна. Энэ хяналтын ажил 2024 он дуустал үргэлжлэн хийгдэнэ. 

Одоо 2021 оны жилийн эцсийн байдлаар Сум хөгжүүлэх санд аймгийн хэмжээнд 6,4 тэрбум төгрөг эргэлдэж байгаагийн 1,9 тэрбум төгрөг сангийн дансанд үлдэгдэл хэлбэрээр байршиж, 4,5 тэрбум төгрөг нь 1042 аж ахуйн нэгж, иргэдийн гар дээр зээл хэлбэрээр байршиж байгаа ба зээлийн үлдэгдлийн 74,5%  буюу 3,4 тэрбум төгрөгийн зээл хэвийн төлөлттэй үргэлжилж, 25,5 хувь буюу 1,1 тэрбум төгрөгийн зээл хугацаа хэтэрч байна. Нийт хугацаа хэтэрсэн зээлийн 28,4% буюу 327,9 сая төгрөгийн зээл явцын хугацаа хэтрэлтэй,  71,6% буюу 257 иргэн, аж ахуйн нэгжид хамаарах 825,9 сая төгрөгийн зээлийн гэрээний хугацаа бүрэн дууссан боловч төлөгдөөгүй хугацаа хэтэрч байна.

Гэрээний хугацаа бүрэн дууссан зээлүүдийг төлүүлэх, шүүхээр шийдүүлэх олон талт арга хэмжээг хэрэгжүүлсний үр дүнд 2018 оны жилийн эцэст гэрээний хугацаа дууссан нийт 688 иргэн, аж ахуйн нэгжид хамаарах 1,9 тэрбум төгрөгийн зээлийн үлдэгдэл байснаас 2019-2021 оны хооронд нийт 138,5 сая төгрөгийн зээлийг зээлдэгчтэй зөвшилцөн төлүүлж, 184 зээлдэгчид хамаарах 887,7 сая төгрөгийн зээлийг шүүхэд шилжүүлж үүнээс 2 зээлдэгчийн 6,0 сая төгрөгийн зээл шийдэгдээгүй хүлээгдэж, шүүхийн шийдвэр гүйцэтгэлээр 672,6 сая төгрөгийн зээл төлөгдөж, 272,5 сая төгрөгийн зээлийг төлүүлэх ажиллагаа хийгдэж байна.