Манай алба Арвайхээрийн нийтийн цэвэрлэгээнд оролцож үүргээ биелүүллээ.

Хуваарьт газар маань анх очиход хоггүй юм шиг харагдаж байсан. Гэтэл өвсийг нь зайлуулаад ирсэн чинь их хогтой байна. Энэ хатсан шарилж хогийг доороо хийгээд нуусан байдаг юм байна. Хамгийн их хогийг татсан тамхины иш, маск 2 эзэлж байна. Тамхи татдаг хүмүүс тамхи татаж өөрийгөө хордуулж, утаа гаргаж агаар бохирдуулж, хогоо хаяж хөрсийг бохирдуулж, өнөө цагт амьдарч байгаа амьд бүхнийг хордуулж, ирээдүй хойч үеийнхээ амьдрах орчныг үгүй хийж их нүгэл үйлдэж байна. Тамхи 5 тамтай гэдэг нь ийм учиртай байж ээ. Мөн халдварт өвчнөөр өвчлөхгүй гэж өөрийгөө хамгаалан маск зүүх мөртлөө хэрэглэсэн маскаа ил задгай хаях нь ямар ухамсаргүй хэрэг вэ? Таны болон бусдын хаясан масканд наалдсан вирус орчинд тарж таны хайртай хүмүүсийг өвчлүүлж ч байж магад, тэгэхгүй юм аа гэхэд хаясан хог чинь байгаль орчинд сөргөөр нөлөөлж эх дэлхийг устгах нүгэлт үйлсэд хувь нэмэр оруулж байгааг ухаараасай. Иймд манай албанаас дараах 2 уриалгыг гаргаж байна.

1. Тамхи татдаг хүмүүст хандан “ТАМХИА ТАТАХАА БАГАСГАХ, ЭСВЭЛ БҮР БОЛИХ, ТАТСАН ТАМХИНЫ ИШЭЭ БАЙГАЛЬД БИШ ХОГИЙН САВАНД ХАЯЖ СУРЦГААЯ”

2. Нийт иргэдэд хандан “ХЭРЭГЛЭСЭН МАСКАА ЗААВРЫН ДАГУУ ЭВХЭЖ ХОГИЙН САВАНД ХАЯЖ ХЭВШИЦГЭЭЕ”